Kur na ndajnë dhe pak ditë nga hapja zyrtare e merkatos së transferimeve, në Serie A kryefaqen e gazetave e zënë titujt me afrime apo largiome lojtarësh. Napoli është një ndër ekipet që supozohet të ketë më shumë lëvizje nga mediat dhe një ndër të larguarit e parë pritet të jetë Elseid Hysaj, i cili pritet ti bashkohet Chelsea në Angli.
Ky transferim është shndërruar në “telenovelë” nëse do të kryhet apo jo, nëse është i mundur apo jo, kush e zëvendëson Hysajn, nëse ky i fundit ikën etj etj. Por është Carlo Ancelotti që vendos ‘pikën mbi i’, gjatë një konference për shtyp.
Shefi i stolit të Napolit i ka vënë kapakun gjithë zërave të merkatos, teksa është shprehur se në janar nuk do të ketë as afrime e as largime nga skuadra. “Askush nuk do të mbërrijë në janar. Lojtarët aktual më kënaqin, janë konkurrues. Nëse do të ketë ardhje do të krijohen probleme në menaxhim, ndërsa një largim i mundshëm do ulte cilësitë”-është shprehur Ancelotti.
Më tej, trajneri i Napolit, u është përgjigjur gazetarëve kur këta të fundit i kanë përmendur Pavard, si një emër i mundshëm për të zëvendësuar Hysaj me shok në krahun e djathtë të mbrojtjes. “Nëse unë them që më pëlqen Pavard, kjo do të ishte mungesë respekti për Hysaj, Malcuit dhe Maksimoviçin, për të cilët jam shumë i lumtur”-është shprehur Ancelotti.
Megjithatë, kjo deklaratë diplomatike e Ancelottit, mund të jetë një lloj kamuflimi për të fshehur lëvizjet në merkato, në lidhje me shitjen e Hysajt.
