Profesori i Historisë së Evropës Juglindore në Universitetin e Vjenës Oliver Jens Schmitt, e cilëson sjelljen e Bashkimit Evropian në Ballkan si një qasje klienteliste.
Në një analizë të botuar në gazetën zvicerane ‘‘Neue Zürcher Zeitung’’,ai thekson se Bashkimi Evropian ka investuar tek dyshja politike, Edi Rama dhe Alekandër Vuçiç në një mënyrë aspak demokratike.
Jens Schmitt shkruan se me qasjen e etnicitetit rreth dyshes Vuçiç-Rama BE nuk ka krijuar veçse grupe klienteliste.
‘‘Me qasjen etnokulturore rreth dyshes Vuçiç-Rama BE ka krijuar grupe klienteliste. Kjo është problematike sidomos në rastin e shqiptarëve. Në Prishtinë janë të shqetësuar dhe të zemëruar që Serbia dhe Shqipëria po i rregullojnë çështjet e Kosovës, pa e konsultuar me Kosovën. Edhe ndërhyrja e Ramës në politikën e brendshme të Maqedonisë, ku i bashkoi partitë shqiptare në një aleancë, nuk është jo problematike. Si Vuçiç ashtu edhe Rama nuk ngurrojnë të lëshojnë parulla dhe aksione nacionaliste. Kush i mbështet ata në mënyrë të njëanshme, mund të blejë stabilitetin, por me një çmim shumë të lartë’’, shkruan Schmitt.
Me këtë politikë që po ndjek Bashkimi Evropian, sipas Schmitt, asnjëra prej këtyre dy vendeve nuk do të zhvillohen si shoqëri të lira dhe demokratike, nëse BE vazhdon të mbështesë modele të tilla autoritare.
‘‘As Serbia, as Shqipëria nuk do të zhvillohen si shoqëri të lira e demokratike, të cilat me ndërgjegje të pastër mund të pranohen në BE. Nëse vazhdohet me mbështetjen e njëanshme të modeleve autoritare politike, atëherë Serbia dhe Shqipëria dhe shtetet e tjera do të shndërrohen në rezervate politike të shpopulluara para portave të BE-së. Ikja sidomos e personave të kualifikuar është që tani tepër e lartë’’, shpjegon profesori i Historisë së Evropës Juglindore në Universitetin e Vjenës, Oliver Jens Schmitt.
