Pasi kaloi fazën e grupeve në Amsterdam, fushata holandeze në EURO 2020 papritmas mori fund kundër Republikës Çeke në Budapest.
Shënuesit më të mirë në fazën e grupeve (8 gola), holandezët i kanë dhënë një tjetër imazh sistemit 5-3-2. Denzel Dumfries solli një seri goditjesh të rrufeshme në krahun e djathtë, Frenkie de Jong depërtonte përmes kundërshtarëve të panumërt në mesfushë dhe Donyell Malen mbiu si një mbështetje ideale për Memphis Depay në sulm.
Çfarë përmban e ardhmja?
Ka shumë talente të rinj në listë, siç kanë treguar Jurriën Timber dhe Ryan Gravenberch. Sidoqoftë, nëse “oranjet” do të garojnë edhe një herë me “qentë më të mirë” në futbollin evropian, apo akoma më tepër në Kupën e Botës, vitin tjetër, ata do të duhet të shtojnë imagjinatë tek loja e tyre, element që mungoi dukshëm gjatë disfatës ndaj Republikës Çeke.
Me rikthimin e Van Dijk, Holanda pritet të rigjejë liderin që i mungon grupit, njeriun që e merr situatën në dorë kur ekipi ka nevojë. Gjithashtu holanda do të rigjejë një mur në mbrojtje që zakonisht preferon të luajë vetëm me një partner në qendër dhe jo në një mbrojtje me tre.
Trajneri pritet të shkarkohet, jo vetëm sepse zhgënjeu me eleminimin kur nuk pritej, por edhe sepse nuk e duan tifozët. 3-5-2-shi i tij nuk është shëmbëlltyrë e identitetit të futbollit holandez. Siç tha dhe Ronald de Boer, vëllai binjak i Frankut, tanimë komentator futbolli në Holandë, “Kruijf do të jetë rrotulluar në varr për 3-5-2-shin që përdor im vëlla”.
Kandidati më i lakuar? Një tjetër Frank, Frank Raijkard. Dhe kujtimet e Barcelonës së 2006-ës, dalin nga sirtari…/Tirana Today
