Bashkësia ndërkombëtare do t’i ofroj përkrahje më të theksuar qeverisë së re. Kështu kanë vlerësuar njohësit e rrethanave politike, Xhelal Neziri dhe Branko Gerovski. Duke komentuar mbi vizitën e kryeministrin Zaev në Bruksel, ata kanë thënë se përkrahja e ndërkombëtarëve do të thoshte një stabilizim të vendit pas një krize dyvjeçare. Neziri ka vlerësuar se ndërkombëtarët do të tentojnë që të gjejnë zgjidhje për të integruar vendin, sidomos në NATO si një strukturë sigurie, me qëllim që të garantohet stabiliteti i Maqedonisë, e me këtë edhe i rajonit.
“Faktori ndërkombëtar pra, Brukseli dhe Uashingtoni janë të interesuar që Maqedonia por edhe rajoni të jenë pjesë e strukturave veri-atlantike, pasi duke mos qenë pjesë e këtyre strukturave bëhen pre e ndikimeve dhe interferimeve që vijnë nga Rusia. Ky ndikim rus mendoj se i ka bërë më vigjilent edhe diplomatët perëndimor, të cilët tanimë besoj se do të jenë të përkushtuar që t’i ndihmojnë Maqedonisë, në drejtim të zgjidhjes së çështjes së emrit me Greqinë, ose në drejtim të anëtarësimit përkohësisht me referencën FYROM”, ka deklaruar Xhelal Neziri, analist.
Ndërkohë, Gervoski thotë se Maqedonia më në fund kthehet në magjistralen kryesore, e cila çon drejt Evropës Perëndimore.
“Kemi marrë nga Brukseli porosi të mira, dyert e NATO-s mbeten të hapura për Maqedonisë. Brukseli po bën shumë presion që të hymë në një proces reformues që të fillojnë negociatat për anëtarësim në BE. Mendoj se kjo vizitë do të jep impuls të fortë në përparimin e reformave, pasi reformat janë fjale kyçe e asaj që duhet të ndodh në këtë periudhë që kemi përpara”, tha Banko Gerovski, analist.
Neziri dhe Gerovski kanë vlerësuar që tani do të përshpejtohet procesi i euro-integrimit të Maqedonisë dhe se është ndezur tani alarmi edhe në Bruksel edhe në Uashington që ky integrim duhet të ndodh, ky zhbllokim i procesit integrues duhet të ndodh. Ata kanë shtuar se tani do të gjendet mënyra se si të bindet Greqia, që fillimisht të zhbllokojë integrimin e Maqedonisë me referencën FYROM, që më pastaj të krijohen edhe kushte por edhe ambienti i përshtatshëm në të dyja vendet, që kontesti të zgjidhet nëpërmjet dialogut ndërmjet dy shteteve dhe nëpërmjet një marrëveshjeje dypalëshe./Shenja/
