Në Kolumbi futbolli ka kaluar çdo parashikim dhe nuk bëhet fjalë për në fushën e lojës. Lojtarët që gabojnë dhe ndikojnë në penalizimin e skuadrës, rrezikojnë të ekzekutohen. Kujtoni Eskobarin në 1994, kur mbrojtësi fatkeq shënoi autogol në ndeshjet kundër Shteteve të Bashkuara të Amerikës dhe Kolumbia u eliminua. Pak ditë më vonë Eskobar mbeti i vrarë në Kolumbi, e hoqën qafe kartelet e drogës, nga nervat e kualifikimit dhe nga paratë e basteve të humbura për fitoren e Kolumbisë.
Edhe pse mendohej që ditët e sotme ky fenomen ishte zhdukur, nuk ka ndodhur kështu. Një ngjarje e ngjashme është regjistruar në Kolumbi, në Kali, pasi një futbollist ka rrezikuar jetën pikërisht pak orë pas eliminimit të ekipit të tij.
Deportivo Kali, klub i madh në Kolumbi, fitoi dje 1-0 në ndeshjen e fundit të kampionatit, por nuk arriti të renditej mes 8 ekipeve të kreut, që kalojnë në play-off për titull. Duket se zemërimi për eliminimin nuk përballohet lehtë në Kolumbi, sepse sot futbollisti Juan Sebastian Quintero ka rënë pre e një atentati.
📃 Comunicado oficial sobre el acto violento ocurrido contra nuestro jugador Juan Sebastián Quintero. pic.twitter.com/qjqeCb9cuq
— ⭐⭐⭐⭐⭐ Deportivo Cali ⭐⭐⭐⭐⭐ (@AsoDeporCali) November 12, 2018
Makina e tij u qëllua nga 6 plumba, por për fat të mirë futbollisti ia hodhi paq, duke mos u goditur nga plumbat. Deportivo Kali ka dënuar ngjarjen dhe ka kërkuar ndihmën e policisë për të shmangur ngjarje të tilla të dhunshme, që tregojnë edhe një herë anën e frikshme të futbollit kolumbian.
