Ambasadorja shqiptare në SHBA, Floreta Faber, ka shprehur mbështetjen e saj në fushatë për kongresmenin amerikan, Eliot Engel.
Përmes një postimi në Twitter, Faber i uron suksese kongresmenit, teksa përmend edhe afërsinë që ai ka pasur me Shqipërinë dhe Kosovën.
“I uroj më të mirën dhe shumë suksese Eliot Engel, gjatë këtij raundi zgjedhjesh për Kongresin e Shteteve të Bashkuara. Njerëzit e Shqipërisë janë bekuar që kanë pasur një kampion dhe një zë të fortë në Kongresin Amerikan për 30 vjet gjatë kohërave më sfiduese. Fat të mbarë kongresmen!”, shkruan ajo.
Wishing the very best and all success to @RepEliotEngel during this round of elections for 🇺🇸 Congress.
Albanian 🇦🇱 people have been blessed to have had a champion & a strong voice in the #USCongress for 30 years, during the most challenging times.
Best of luck Congressman!
— Floreta Faber 🇦🇱 (@FloretaFaber) June 23, 2020
Mirëpo ky reagim i saj ka sjellë mjaft pakënaqësi, pasi një diplomat e ka të ndaluar që të shprehë pëlqime publike apo të mbajë anën e ndonjë kandidati.
Ndjekësit në Twitter kanë nxituar që t’i rikujtojnë ambasadores, se sipas protokollit ndalohet rreptësisht përfshirja e ambasadorëve në fushata elektorale të vendeve pritës.
“Zonja Faber, është krejtësisht joprofesionale që një diplomat të përzihet në zgjedhjet e një vendi pritës dhe aleat. Nuk e ndihmon Shqipërinë me një diskurs të tillë”, shkruan një ndjekës.
Ndërsa një komentues tjetër ka replikuar duke etiketuar presidentin Trump: “A është normal ky veprim për një diplomat?”.
Eliot Engel njihet si një mik i Shqipërisë, pasi prej kohësh adreson problematikat e rajonit.
