Vëmendja e ndërkombëtarëve në procesin e numërimit është e lartë. Megjithëse rezultatet e deri tanishme falsin për një fitore të thellë të Partisë Socialiste sërish është shumë ë rëndësishme që procesi i numërimit të jetë i qetë në mënyrë që zgjedhjet të certifikohen nga OSBE/ODIHR. Procesi i zgjedhjeve të lira dhe të ndershme është i rëndësishëm edhe për ambasadorët e akredituar në Tiranë. Ambasadori i SHBA-ve, Donald Lu ka dalë personalisht në terren mëngjesin e sotëm.
Sipas raportimeve, Ambasadori Lu ka qenë në njësinë nr.5 në kryeqytet, ku që mbrëmë vijon procesi i numërimit të votave.
Më pas ambasadori ka ndaluar në disa qendra numërimi dhe mësohet se do të vijojë me vëzhgimin edhe në të tjera.
Ai ka takuar nga afër numëruesit dhe vëzhguesit duke i uruar punë të mbarë, por nuk ka pranuar të japë asnjë prononcim për mediet.
Po dje, pas denoncimeve të bëra nga Lëvizja Socialiste për Integrim për raste të blerjes së votave nga kandidatët e PS-së në Shijak, ambasadori i SHBA ka shkuar në disa qendra votimi në qarkun e Durrësit.
34 ekipe të Ambasadës së Shteteve të Bashkuara, vëzhgojnë votimin dhe numërimin në të gjithë vendin. USAID do të mbështesë edhe 540 ekipe të tjera vëzhguese vendore të shoqërisë civile kudo në Shqipëri.
