Ambasadori rus në Tiranë, Mihail Afanasiev është shprehur se shpreson që me krijimin e qevrisë së re në Shqipëri, marrëdhëniet mes vendit tonë dhe Rusisë të stabilizohen dhe të trajtojnë sërish temën e komisionit ndërqeveritar.
Në një intervistë për MCN TV, Afanasiev tha se marrëdhënia mes Shqipërisë dhe Rusisë u prish nga faktorë të jashtëm dhe artificiale.
Ambasadori rus, deklaroi se pavarësisht marrëdhënieve që vendi i tij ka me Serbinë, Rusia nuk e përjashton njohjen e Kosovës si shtet.
Mihail Afanasiev: “Shpresojmë që pas përfundimit të zgjedhjeve parlamentare të datës 25 prill dhe formimit të qeverisë së re të Shqipërisë, autoritetet e vendit do të kenë mundësinë të trajtojnë temën e komisionit ndërqeveritar, dhe më pas të mund të kthehemi së bashku në tryezën e bisedimeve dhe të diskutojmë të gjitha çështjet e ngutshme të bashkëpunimit tonë. Ne nuk i diktojmë askujt si të jetojë dhe nuk japim këshilla, nëse nuk na kërkohet. Fakti që edhe Shqipëria pranoi marrjen e vaksinës Ruse Sputnik pas refuzimit fillestar nga kryeministri Rama është pozitive.
Arsyet e rënies së nivelit të marrëdhënieve tona më duken disi artificiale. Me sa duket, ky është një nga elementët e luftës politike që po zhvillohet jo vetëm midis forcave politike në vetë Shqipëri, por edhe në rajon në tërësi, në të cilin lojtarë të ndryshëm të jashtëm garojnë për të ushtruar ndikim. Shembuj të gjallë, përfshirë ato të vendeve fqinje, tregojnë se kjo gjendje e bashkëpunimit tonë dypalësh nuk është normale. Rusia pranon çdo zgjidhje që do të arrihet nga palët. Nëse zgjidhja do të thotë pavarësi, atëherë Rusia do të njohë pavarësinë e Kosovës.”