Ambasadori i Italisë, Alberto Cutillo ka zhvilluar një vizitë në Drejtorinë së Përgjithshme të Policisë së Shtetit, ku u prit nga kreu i Policisë së Shtetit, Haki Çako.
Qëllimi i vizitës ishte inspektimi nga afër i Laboratorit Tekniko-Shkencor të Policisë Italiane, Guardia di Finanza dhe Qendrës BENECON, që është instaluar në ambjentet e Drejtorisë së Përgjithshme të Policisë së Shtetit, në zbatim të Protokollit Operativ për fluturimet ajrore 2017 për parandalimin e goditjen e kultivimit të bimëve narkotike.
Gjatë fjalës së tij, ambasadori Cutillo tha se është i kënaqur për bashkëpunimin e deritanishëm, ndërsa theksoi rëndësinë e betejës në luftën kundër drogës:
“Jam i kënaqur që edhe drejtori është i kënaqur për këtë bashkëpunim dhe kështu do të vazhdojmë. Është shumë e rëndësishme që 2 vendet tona të ecin përpara në këtë betejë.
Do të vazhdojmë gjatë këtij viti duke shpresuar që të festojmë ashtu siç thoni ju, rezultate të rëndësishme të përbashkëta.”
Ndërkohë, kreu i Policisë së Shtetit falënderoi për mbështetjen Qeverinë Italiane, Ministrinë e Brendshme dhe të gjithë stafin e Laboratorit të Policisë Italiane në identifikimin, gjetjen dhe asgjësimin e bimëve narkotike edhe në ato zona shumë të thella gjeografikisht, ku bëhet dhe më i rëndësishëm monitorimi nga ajri. Gjithashtu, Çako tha se nga janari deri më tani, është shkelur thuajse pëllëmbë për pëllëmbë i gjithë territori shqiptar në luftën kundër kanabisit:
“I gjithë territori i vendit është shkelur thuajse pëllëmbë për pëllëmbë nga forcat e Policisë në këmbë që nga Janari deri tani. Ne kemi ndërhyrë në kohë reale, kemi shkatërruar si dhe do të vazhdojmë të investigojmë dhe do ta realizojmë që të gjithë dokumentacionin e prodhuar edhe falë monitorimit ajror, deri në fund. Të gjithë përgjegjësit do përballen me drejtësinë.
Së bashku do të vazhdojmë me identifikimin, gjetjen dhe asgjësimin edhe në ato zona shumë të thella gjeografikisht por me vështirësi maksimale për forcat e Policisë.
Besoj shumë që edhe instalimi i Laboratorit këtu ishte një punë e shkëlqyer sepse përveçse bëhet përpunimi në kohë reale i informacionit dhe shumë gjëra që duhen sqaruar, shpesh herë sqarohen drejtpërsëdrejti mes ekspertëve tanë dhe kolegëve”, tha Çako.
