Diplomati britanik Alastair King-Smith, në fjalën e mbajtur në panelin e Kongresit Kombëtar të Arsimit në Tiranë, iu referua të rinjve që udhëtojnë ilegalisht me gomone apo rrugë të tjera transporti ilegal drejt Britanisë së Madhe. Ambasadori u shpreh se këto janë mënyra të rrezikshme, ndërsa kërkoi nga të rinjtë që të mos bien pre e shfrytëzimit nga kontrabandistët për pasurim të menjëhershëm. Duke qëndruar në të njëjtën linjë, ai shtoi se premtimet e pasurisë së shpejtë janë gënjeshtra, pasi do detyrohen të përfshihen në aktivitet kriminal dhe drogë.
“Shumë të rinj largohen nga Shqipëria. Këta të rinj shfrytëzohen nga kontrabandistët, ne i nxisim që të ndalojnë. Premtimet e pasurisë së shpejtë janë gënjeshtra, pasi do detyrohen të përfshihen në aktivitet kriminal dhe drogë, por këto kushte do bëhen edhe shumë të rrezikshme.
Ju bëj thirrje të rinjve që mos të udhëtojnë në mënyrë të jashtëligjshme. Rruga drejt suksesit nuk varet nga gomonet, varet nga arsimi dhe puna e palodhur. Nuk mjafton që të japim argumente intelektuale. Ndaj ne do lançojmë një program për të nxitur mundësitë e punësimit të të rinjve, që t’u japim aftësitë që kërkon tregu i punës”, tha Alastair King-Smith.
Ambasadori i Britanisë së Madhe bëri thirrje edhe për krijimin e mundësive më të mira arsimore për fëmijët e zonave të thella.
“Këtu kemi komunitet në zona rurale malore të thella. Por kemi edhe komunitetet të disavantazhuara në qytete që përballen me rrethana të vështira, duke shkaktuar ose braktisjen e shkollës ose mos frekuentimin e shpeshtë të saj. Të sigurohemi që ne ju japim fëmijëve kohën edhe mundësinë për të shkuar në shkollë”.
