Ambasada Amerikane në Tiranë, ka përgëzuar Policinë e Shtetit dhe Prokurorinë e Krimeve të Rënda, lidhur me përfundimin me sukses të pjesës së dytë të operacionit “One by Land”, javën e kaluar në bashkëpunim me DEA. Në postimin në fjalë në Facebook, citohet se ky operacion ka bërë të mundur shkatërrimin e shtatë grupeve të strukturuara kriminale, të cilët mundësonin kalimin e paligjshëm të kufijve, duke lëshuar dokumente të falsifikuar. Grupet kriminale operonin në disa shtete, si në Shqipëri, Bullgari, Spanjë, Francë, Republikën Domenikane, Itali, Mbretërinë e Bashkuar, Shtetet e Bashkuara dhe Kanada. Në përfundim të operacionit, janë vënë në pranga dy oficerë shqiptarë, me detyrë kontrollorë kufiri, të cilët bashkëpunonin me grupet.
“Ambasada e Shteteve të Bashkuara përgëzon Policinë Shqiptare të Shtetit dhe Prokurorinë e Krimeve të Rënda, për përfundimin me sukses të pjesës së dytë të operacionit “One by Land” javën e kaluar, ndërmarrë në bashkëpunim me agjentët specialë të Shërbimit të Sigurimit Diplomatik të Departamentit të Shtetit pranë Ambasadës Amerikane në Tiranë.
Ky operacion bëri të mundur shkatërrimin e shtatë grupeve të strukturuara kriminale, të cilët mundësonin kalimin e paligjshëm të kufijve duke lëshuar dokumente të falsifikuar. Këto grupe operonin në Shqipëri, Bullgari, Spanjë, Francë, Republikën Domenikane, Itali, Mbretërinë e Bashkuar, Shtetet e Bashkuara dhe Kanada. Si pjesë e operacionit, policia arrestoi dy oficerë shqiptarë policie me detyrë kontrollorë kufiri, të cilët bashkëpunonin me grupet. Shtetet e Bashkuara do të vazhdojnë të ndihmojnë dhe mbështesin përpjekjet në zbatimin e ligjit për të parandaluar emigrimin e paligjshëm dhe për të arrestuar personat përgjegjës”, citon Ambasada.
