Ambasada Amerikane në Tiranë ka reaguar lidhur me dënimin e Shullazit, vendim të cilin e përshëndeti ditë më parë. Por, në kuadër të këtij vendimi, ambasada kërkon hetim të plotë dhe sundimin e ligjit edhe lidhur me çështjen e Ervis Martinajt dhe atë të deputetit Saimir Tahiri.
“Dje, Gjykata e Apelit të Tiranës dëgjoi argumentet e prokurorëve lidhur me masën e sigurisë për Ervis Martinaj. Ne presim hetimin e plotë të tij, ashtu siç presim që sundimi i ligjit të zbatohet gjatë hetimit në vazhdim për Saimir Tahirin. Shtetet e Bashkuara mbeten të përkushtuara ndaj së ardhmes së Shqipërisë”, shkruhet ndër të tjera në njoftimin e publikuar në faqen zyrtare në Facebook.
Në fund të postimit, ashtu siç pati paralajmëruar më parë, Ambasada Amerikanë në Tiranë shkruan “Kush e ka radhën”?
Të jetë ky një paralajmërim lidhur me çështjen e bujshme të Tahirit? Kujtojmë se në muajin tetor, ish-ministri i Brendshëm Saimir Tahiri doli në një konferencë, ku bëri me dije vendimin e Antimafias italiane, që e shpallte të pafajshëm, ndërkohë që në Shqipëri hetimi vazhdon ende.
Reagimi i plotë:
Gjykata e Krimeve të Rënda të Shqipërisë dënoi Emiljano Shullazin dhe grupin e tij, por presim përparim të vazhdueshëm në rrugën e Shqipërisë drejt sundimit të fortë të ligjit. Dje, Gjykata e Apelit të Tiranës dëgjoi argumentet e prokurorëve lidhur me masën e sigurisë për Ervis Martinaj. Ne presim hetimin e plotë të tij, ashtu siç presim që sundimi i ligjit të zbatohet gjatë hetimit në vazhdim për Saimir Tahirin. Shtetet e Bashkuara mbeten të përkushtuara ndaj së ardhmes së Shqipërisë.
