Ish-deputeti i PS-së Alqi Bllako u arrestua për “korrupsion” dhe “shpërdorim detyre” në lidhje me aferën e inceneratorit të Fierit. Gjyqtarja Irena Gjoka vendosi ta lërë në qeli ish deputetin e PS-së, duke caktuar vijimin e “arrestit me burg”, kërkuar nga SPAK. Ndërkohë që vetë Bllako ka zgjedhur të mos flasë, por të përfaqësohet nga avokati i tij.
Avokati mbrojtës i ish-deputetit, Sokol Hazizaj tha për mediat pas vendimit të GJKKO se klienti i tij ka përcjellë dokumentet e Keshillit te Ministrave dhe nuk ka prodhuar akte.
Avokati akuzoi gjykatën dhe organin e hetimit se nuk njeh kodin e procedurës administrative. Sa i takon akuzave të SPAK se Bllako ka udhëtuar me bosin e inceneratorëve, Klodian Zoton, Hazizaj tha se nuk është provuar që bileta të jetë blerë nga Zoto.
Avokati Sokol Hazizaj pas seancës deklaroi se nuk provohen faktet se Bllako është fajtor.
“Tre faktet penale të cilat janë identifikuar nga Prokuroria që lidhen me shpronësimin, pagën e të atit janë akte të provuara jo nga Alqi Bllako. Në cilësinë e sekretarit të përgjithshëm ka përcjellë vetëm dokumentacionin e dalë nga Këshilli i Ministrave”.
Po a ka udhëtuar me Klodian Zoton?
“Kjo nuk u përmend nga kërkimet e organit procedurial. Kjo nuk është provë bindëse sa kohë që nuk është provuar që e ka paguar biletën. Sado të udhëtojmë bashkë në avion, nuk do të thotë që kemi lidhje bashkë”, tha avokati.
Kërkesa u dorëzua në gjykatë nga prokurori Dritan Prençi. Ai kërkon marrjen në pyetje të Alqi Bllakos në hetim për “Shpërdorim të detyrës” në bashkëpunim “Korrupsion pasiv i funksionarëve të lartë shtetërore ose i të zgjedhurve vendorë”.
Gjyqtarja Irena Gjoka vendosi zbatimin e masës së sigurimit personal me karakter shtrëngues “arrest me burg”. Më pas ish deputeti socialist Alqi Bllako hipi në makinat e policisë, për t’u transferuar në dhomat e paraburgimit ku dhe do të qëndrojë deri në një moment të dytë.
