Lideri i Bashkimit Demokratik për Integrim (BDI), Ali Ahmeti ka shpallur fitoren absolute të BDI-së në zgjedhjet lokale në shumicën e komunave shqiptare, që nga Struga e deri në Likovë.
“Jam këtu për të kumtuar fitoren e madhe të Bashkimit Demokratik për Integrim (BDI) në Tetovë, në Strugë, në Çair, në Dibër, në Saraj, në Likovë, në Dollnen, Tearcë, Pllasnicë dhe Kërçovë. Bashkëkombës shqiptar dhe të gjithë ju qytetarë të Maqedonisë, me këtë rast dua të falënderojë të gjithë votuesit që shprehën vullnetin e tyre për këtë fitore të madhe të radhës të BDI-së”, ka thënë Ali Ahmeti, lider i BDI-së në paraqitjen e tij para gazetarëve nga ku edhe shpalli fitoren e BDI-së.
Do të doja të falënderojë, shtoi ai, çdo votues dhe familje që janë përcaktuar në përkrahje të këtyre kandidatëve që për katër vitet e ardhshme do të udhëheqin me komunat fitimtar.
“Me këtë rast dua të falënderojë shtabin qendror dhe të gjithë shtabet komunale e lokale për një të gjithë sepse e kanë punuar pa reshtur që të sigurojmë fitoren, një fitore që shënon edhe 20 vjetorin në vitin 2021 të BDI-së. Sigurisht se ka momente ndonjë betejë edhe mund të humbet por një betejë e humbur nuk do të thotë se është humbur e tërë lufta. Me këtë rast dua që në Gostivar të them se jemi në pritje edhe të rezultateve finale, mbetet që të shohim se si do të zhvillohet finalja”, ka theksuar Ahmeti.
Ai potencoi se megjithatë ne jemi të përgatitur jemi aq të mëdhenj sa që edhe ndonjë betejë të vogël të humbur atë e shndërrojmë në forcë, transmeton zhurnal.
“Të gjitha komunat janë të gjithë qytetarëve, BDI do të ndihmojë edhe në ato komuna ku mund të ketë humbur. Uroj të gjithë fitimtarët, të gjithë qytetarët. Kjo fitore është për të gjithë qytetarët shqiptar, për gjithë ata të cilët kanë votuar, por edhe ato që nuk kanë votuar për ne, kryetarët e ardhshëm do të jenë kryetar të të gjithë qytetarëve”, potencoi Ahmeti.
