Kreu i Vetëvendosjes, pas takimit me studentë e pedagogë të Shkencave Sociale ka bërë thirrje për një “pranverë shqiptare”, që populli shqiptar të demokratizojë veten në mbrojtje të interesit shtetëror.
“Në Kosovë e Shqipëri duhet të përgatitemi për një pranverë shqiptare meqënëse në kushtet kur ekonomikisht jemi të dobët dhe ushtritë janë inekzistente është e domosdoshme që populli shqiptar të rishfaqet dhe demokratizojë veten në mbrojtje të interesit të tij shtetëror”, tha Kurti për mediat pas bisedës që pati me studentët në fakultetin e Shkencave Sociale.
Ai e cilësoi protestën e studentëve si ngjarja më e bukur në vitet e fundit:
“Protesta e studentëve në këtë dimër që nuk po kalon janë ngjarja më e bukur shoqërore dhe zhvillimi më autentik politik vitet e fundit”.
Po ashtu, Kurti dha mesazhin e bashkimit me Shqipërinë, dhe jo të pazareve me Serbinë:
“Ne themi po bashkimit me Shqipërinë, jo pazare me Serbinë. Bashkimi duhet të na rrisë e jo të na fragmetizojë, duan ta ndotin fjalën bashkim duke e sajuar skemën sipas të cilës për të bashkuar me Shqipërinë duhet t’i japim tokën Serbisë. Serbia na ka borxh shumë”.
