Lëvizja Vetëvendosje ndoshta është në pikën më të vështirë që nga themelimi i saj.
Sigurisht themeluesi i kësaj force politike Albin Kurti është një zë i fortë brenda partisë, megjithëse vitet e fundit nuk ishte më kryetari i saj.
Situata ka ndryshuar dhe Kurti mund të rikthehet sërish në krye të kësaj partie.
Zyrtarisht janë është mbyllur mundësitë për të gjithë anëtarët e kësaj force politike për të kandiduar për kryetar. Albin Kurti është i vetmi kandidat për kryetar të Lëvizjes Vetëvendosje.
Në dhjetor të vitit të kaluar, ndërsa Kurti gjendej në paraburgim, autorizoi deputetet Albulena Haxhiu dhe Fitore Pacolli që të mbledhin nënshkrimet për ta paraqitur kandidaturën e tij.
Ky proces zgjedhor vjen mes polemikave të shumta, dorëheqjeve nga partia dhe kundërshtimeve.
Përveç Visar Ymerit dhe aktivistëve në pozicione të ndryshme, dorëheqje të parevokueshme nga të gjitha funksionet në VV kanë dhënë deputetët: Aida Dërguti, Dardan Sejdiu, Faton Topalli, Shqipe Pantina dhe Driton Çaushi për shkak të pakënaqësive të brendshme me të cilat po përballet VV prej disa javësh. Po ashtu dorëheqje ka dhënë edhe kryetari i komunës së Kamenicës, Qëndron Kastrati.
Zgjedhjet e brendshme në Vetëvendosje pritet të mbahen në muajin shkurt.
