Albin Kurti i kërkon të gjithë mbështetësve, simpatizantëve dhe përkrahësve që të mos vijnë në Lëvizjen Vetëvendosje me idenë se do të pasurohen aty. Ndërkohë bashkëshortja e tij ka një vlerë kesh prej 85 mijë euro.
“Nga aktivizimi nuk guxon të pasurohesh materialisht. Nuk duhet të bëhen politikanet e Lëvizjes më të pasur se kur kanë hyrë në Vetëvendosje, bile preferohet të bëhen më të varfër”, tha Kurti gjatë paraqitjes së platformës së tij para anëtarëve të kësaj partie si kandidati i vetëm për kryetar të saj.
Për shumëkënd, kjo thirrje do të ishte e logjikshme dhe lehtë e pranueshme sikur vetë Kurti të mos qëndronte edhe aq mirë ekonomikisht.
Ndonëse në vitin 2010 Kurti bëri një gjest që deri atëherë asnjë kryetar partie nuk e kishte bërë – shiti banesën e tij për ta financuar fushatën elektorale në zgjedhjet e para që po merrte pjesë, e cila megjithatë më vonë iu shpërblye me postin e deputetit.
Ishin 70 mijë euro të ardhura që Kurti i mblodhi nga shitja e banesës. Thirrja e Kurtit se nga aktivizim nuk guxon të pasurohesh materialisht, nuk me gjendjen e tij ekonomike.
Edhe pse ai ka deklaruar se merr vetëm pagën e deputetit në Kuvendin e Kosovës, megjithatë, baza e tij ekonomike është e fortë. Përveç të ardhurave vjetore rreth 18 mijë euro, për bashkëshorten e vet Kurti ka deklaruar se ka para të gatshme në vlerë prej 85 mijë euro.
Nuk ka dëshmi që Kurti është pasuruar prej hyrjes në politikë, por baza e tij ekonomike bënë që ai me komoditet të kërkojë “varfërimin” e të tjerëve nga aktivizmi.
