Mbrojtësi Albert Serran ka mbyllur me mirëkuptim marrëveshjen që kishte me kampionët e Shqipërisë, dhe nuk do të jetë më pjesë e Kukësit. Vendimi është marrë bazuar në atë që ndodhi në Moldavi, gjatë dhe pas ndeshjes së parë ndaj Sherif Tiraspol.
Serran ishte shkaktari i penalltisë së humbjes 1-0, që rezultoi vendimtare për fatin e kualifikimit dhe ishte një nga arsyet pse Kukësi doli nga Liga e Kampioneve. Futbollisti ka qenë i dëshpëruar pas ndeshjes, edhe më shumë për faktin se në klub kishte dyshime rreth pastërtisë së tij, aq sa i bënë një kontroll të plotë celularit dhe laptopit të spanjollit për prova të mundshme tentative manipulimi të ndeshjes. Nga kontrolli nuk u zbulua asgjë dhe më pas drejtuesit e Kukësit i kërkuan falje Serran. Por edhe “pajtimi publik” me festimin e datëlindjes ku ishte i pranishëm edhe presidenti Gjici nuk shërbeu. Menjëherë pas eliminimit në Ligën e Kampioneve, futbollisti u ka kërkuar drejtuesve të klubit që të prishë kontratën që kishte lidhur me ta.
Ai e ka thënë se drejt kësaj kërkese e coi fakti se e ndjente veten shumë fajtor për këtë eliminim. Kërkesa u plotësua nga Kukësi dhe palët janë ndarë me mirëkuptim gjatë ditës së sotme.
