Piloti i një aeroplani pasagjerësh që udhëtonte nga Polonia për në Mbretërinë e Bashkuar duhej të bënte një ulje të paplanifikuar në Paderborn, për shkak të një kërcënimi me bombë.
Për shkak të kërcënimit për një bombë në bord, avioni u detyrua të bënte një ulje emergjente në qytetin gjerman Paderborn rreth orës 22:00 të ditës së djeshme. Kontrollet e mëvonshme të policisë në avion, nuk identifikuan ndonjë objekt të rrezikshëm.
Operacionet e kontrollit të avionit, ku përfshiheshin edhe qentë e trajnuar posaçërisht, u zhvilluan gjatë gjithë natës dhe gjithashtu këtë mëngjes.
Njerëzit në bordin e avionit, gjithsej 199 pasagjerë dhe 7 anëtarë të ekuipazhit, e kaluan natën në një hotel aeroporti.
“Nuk ka asnjë rrezik për ta”, tha policia e cila foli për një operacion më të madh. Aeroporti gjerman qëndroi i mbyllur gjatë operacioneve të kontrollit, por u rihap në orët e para të mëngjesit të sotëm.
Autoritetet polake të sigurisë së aviacionit dhe linja ajrore kishin kërkuar një ulje emergjente në Gjermani. Raporti, siç rezulton, ka ardhur përmes telefonit.
“Asgjë e dyshimtë nuk u gjet”, siguroi më vonë një zëdhënës i policisë. Sot, avioni që u ul në Paderborn pritet të vazhdojë për në destinacionin e tij në Londër, siç ka konfirmuar një zëdhënës i policisë.
Burimi i lajmit: thenationview. Përshtatur nga Tirana Today
