Më shumë se gjysma e produkteve të njohura kozmetike që shiten në SHBA dhe Kanada ka gjasa që të përmbajë nivele të larta të kimikateve toksike të quajtura substanca polifluoroalkil (PFAS), thuhet në një studim të fundit.
Studiues nga Universiteti Notre Dame, testuan më shumë se 200 produkte përfshirë korrektorët, kremrat pudër, produktet që përdoren për sytë dhe vetullat, si dhe produktet që përdoren për buzët, ku gjetën përmbajtje të larta të kimikateve toksike të PFAS në rreth 52 përqind të tyre.
Kjo është shumë shqetësuese, pasi disa studime të mëparshme e kanëparë PFAS si shkaktaren e disa sëmundjeve, që përfshijnë kancerin e veshkave, kancerin e testikujve, hipertensionin, sëmundjen e tiroides, peshën e ulët tek foshnjat e sapolindura dhe imunotoksicitetin tek fëmijët.
Profesor Graham Pizli, i cili ka drejtuar studimin, tha:“PFAS është një kimikat i qëndrueshëm – kur futet në sistemin e qarkullimit të gjakut, ai qëndron atje dhe grumbullohet. Gjithashtu ekziston rreziku shtesë i ndotjes së mjedisit, që ka të bëjë me prodhimin dhe asgjësimin e këtyre produkteve, i cili mund të prekë shumë më tepër njerëz”.
Sipas Institutit Kombëtar të Shkencave të Shëndetit Mjedisor, PFAS është një grup i madh, dhe kompleks i kimikateve të prodhuara që po përdoren gjithnjë e më shumë për të prodhuar lloje të ndryshme të produkteve kozmetike që përdoren në përditshmëri.
Sipas këtij Instituti:“Këto kimikate bëjnë që ushqimet të mos ngjisin tek enët e gatimit, i bëjnë rrobat dhe qilimat rezistente ndaj njollave, dhe krijojnë një lloj lënde që përdoret nga zjarrfikëset që është shumë efektive. PFAS përdoren në industri të tilla si hapësira ajrore, ajo e prodhimit të automjeteve, ndërtimit, elektronikës dhe ushtri”.
Në studim, ekipi testoi më shumë se 200 produkte kozmetike për tw parë nëse kishin në përbërjen e tyre elementin kimik fluor – një tregues ky i përdorimit të PFAS në produkt. Analiza e tyre zbuloi se 56 për qind e kremrave pudër dhe produkteve të syve, 48 për qind e produkteve të buzëve dhe 47 për qind e rimeleve përmbanin nivele të larta të fluorit.
Në veçanti, produktet e reklamuara si “afatgjata” dhe që kanë “rezistencë të lartë” u zbulua se përmbanin nivele të larta të këtij elementi kimik, çka nuk është për t’u habitur sipas ekipit, duke pasur parasysh që PFAS përdoren shpesh tek produktet kozmetike në mënyrë që ato të jenë rezistente ndaj ujit dhe tek vetitë e tyre përbërëse.
Në 29 produkte të tjera që u testuan më pas, u zbulua se ato përmbanin deri në 13 PFAS – megjithatë vetëm një nga këto artikuj e kishte përfshirë atë tek përbërësit e produktit.
Profesori Peaslee tha: “Ky është tejkalim i përdorimit. Matjet tona tregojnë përdorimin në masë të PFAS në këto produkte – por është e rëndësishme të theksohet se shkalla e plotë e përdorimit të kimikateve të fluorit në kozmetikë është e vështirë të vlerësohet për shkak të mungesës së kërkesave të rrepta për etiketimin në vende të ndryshme.”
PFAS njihen si “kimikate të pavdekshme” sepse ato nuk degradojnë natyrshëm, çka do të thotë se për dekada të tëra mund të ndotin ujërat nëntokësore. Një studim i mëhershëm ka identifikuar se përveçse në kozmetikë, këto kimikate mund të gjenden edhe tek enët e gatimit që nuk ngjisin, veshjet e fabrikave dhe mbështjellësit e ushqimit të shpejtë.
“Këto rezultate janë veçanërisht shqetësuese kur merret parasysh rreziku i ekspozimit ndaj konsumatorit, e kombinuar kjo me masën dhe shkallën e një industrie miliarda dollarëshe, që ua shet këto produkte miliona konsumatorëve çdo ditë,”- tha profesori Pisli.
Profesor Pisli gjithashtu shtoi:“Ekziston rreziku individual -pasi këto janë produkte që aplikohen rreth syve dhe gojës,çka e shton rrezikun që ato të përthithen përmes lëkurës apo kanalit të lotëve, si dhe nuhatjes ose gëlltitje e mundshme.”
Burimi i lajmit: https://www.dailymail.co.uk/sciencetech/article-9687659/More-HALF-cosmetics-likely-contain-toxic-chemicals-cause-CANCER-study-warns.html
Përshtatur nga TIRANA TODAY