“Alarm” në Bundesligë, yjet e futbollit nuk u thonë më jo ekipeve italiane

Vitet e fundit Serie A ka qenë në nivele shumë të ulëta dhe yjet refuzonin të bashkoheshin me ekipet italiane, ku vetëm Juventusi kishte luksin të forcohej. Por duket se tashmë kampionatit italian po i kthehet lavdia e dikurshme. Me Napolin konkurrues për titull dhe Interin e rikthyer në Champions, liga po forcohet më shumë, por edhe Milani përpiqet të rikythehet i fortë me investime serioze.Në Itali, disa nga skuadrat e Serisë A, i kanë kthyer sytë nga Gjermania për të gjetur përforcime. Në shënjestër janë lojtarë të ndryshëm. Timo Werner intrigon Milanin, ndërsa Vidal është një dëshirë e hershme e disa skuadrave të mëdha. Werner është një nga emrat që i pëlqen më shumë Milanit, pasi 22-vjeçari është teknik dhe i fortë fizikisht. Por Laipzig kërkon 70 milionë euro. Sulmuesi gjerman do të jetë në Botëror dhe për të ka interes nga disa skuadra të mëdha europiane, ndaj nuk do të jetë e lehtë për ta marrë.Vidalin e ëndërron Napoli, duke ditur raportin e mirë që kiliani ka me trajnerin Ancelotti. Por Vidal është përfolur mjaft herë si një mundësi për mesfushën e Interit, pasi është lojtari që i mungon. Nuk do të jetë e lehtë edhe për asnjërën, aq më tepër që Vidal është nën hetim në Gjermani për një zënkë në një lokal. Robert Lewandowski ka kërkuar zyrtarisht largimin nga Bayerni dhe kërkon stimuj të rinj. Në Itali e ëndërrojnë edhe atë, Juventusi dhe ndonjë ekip tjetër, por duhen 100 milionë euro.