Procesi gjyqësor ndaj ish-deputetit Alfred Peza është shtyrë më 25 shtator. Shkak është bërë mungesa e avokatëve mbrojtës dhe vetë ish-deputeti i PS-së.
Ndërkohë, prokuroria ka kërkuar që dosja të kalojë në Gjykatën e Tiranës për gjykim, pasi Alfred Peza nuk është më deputet, por Gjykata e Lartë nuk merr dot vendim pa prezencën e të pandehurit ose avokatit.
Peza po hetohet për të paktën tre vepra penale, “Fshehje e të ardhurave”, “Pastrimi të produkteve të veprës penale” dhe “Refuzimi për deklarim, mosdeklarim, fshehja ose deklarimi i rremë i pasurive”.
Më 18 prill, gjykata për Krime të Rënda vendosi sekuestro preventive të aksioneve të bashkëshortes së Pezës të një banke të nivelit të dytë në vend.
Vendimi erdhi si pasojë e hetimeve që nisën ndaj ish-deputetit socialist dhe bashkëshortes së tij Mirela Ndini, pas publikimit në media se në mars të vitit 2015 Ndini kishte blerës 1 përqind të aksioneve të bankës me një vlerë prej 113 milion lekë. Sipas prokurorisë, “në bazë të veprimeve të deritanishme hetimore rezulton se, pavarësisht se aksionet në Bankë janë blerë nga shtetasja Mirela Ndini, vlera financiare është realizuar në bazë të kontributit financiar të të dy bashkëshortëve”.
Vetë Peza ka sqaruar më herët se pasuria prej 113 milion lekësh me të cilat bleu aksionet në një bankë private, është vënë nga kursimet.
