Kërkesa e Prokurorisë Speciale të Maqedonisë për ndalimin e Gruevskit dhe jo vetëm, ka sjellë reagimin e mbështetësve të kreut të VMRO-DPMNE.
Këta të fundit kanë protestuar mbrëmjen e së enjtes përpara Gjykatës Penale në Shkup, duke mbështetur anëtarët e partisë së Nikolla Gruevskit, për të cilët Prokuroria Speciale e Maqedonisë dorëzoi një ditë më parë 17 aktakuza, shoqëruar me kërkesën për veprime paraprake dhe masa ndalimi.
Akuzat u depozituan dy ditë përpara skadimit të afatit mbi ngritjen e padive që burojnë nga dhjetëra hetime, ndërsa gjykatësit tani duhet të dalin me një vendim brenda 24 orësh.
LSDM-ja shprehet në një deklaratë se qytetarët patën mundësinë të dëgjojnë, shohin dhe ndjejnë sundimin kriminal dhe antishtetëror të Gruevksit e VMRO-së.
“Kjo parti u pasurua në kurriz të varfërimit të shtetasve të shtypur të këtij vendi. Tani drejtuesit e saj përballen me përgjegjësinë e veprave të tyre. Ata duhet t’i japin fund përpjekjeve për të shmangur drejtësinë e për ta vendosur veten mbi ligjin. Që të gjithë, përfshirë Gruevksin dhe lidershipin e VMRO-DPMNE-së, duhet të japin llogari përpara një sistemi gjyqësor të pavarur e profesional”, thuhet ndër të tjera në këtë deklaratë.
Komisioni Europian “i ka lënë detyrë” kryeministrit të ri Zoran Zaev dhe qeverisë së tij implementimin e reformave urgjente prioritare me qëllim forcimin e ligjit, në mënyrë që në tetor të sigurohen rekomandimet nga Brukseli për nisjen e bisedimeve të anëtarësimit në BE.
