Sebastian Vettel ishte në vendin e tretë në momentin që një përplasje me pilotin holandez, Verstappen bëri që të humbte podiumin në Cmimin e Madh të Kinës. Max Verstappen ishte i pozicionuar shumë pranë dhe pritej që ta parakalonte Vettelin, por manovra që zgjodhi të bënte holandezi rezultoi e gabuar dhe penalizuese. Piloti i Red Bull në tentativë parakalimi ndaj Vettelit bëri që ky i fundit të rrotullohej pasi u prek nga Red Bulli dhe të përfundonte në vendin e tetë një garë që e nisi nga vendi i parë.
Në fund të garës, Vettel u shpreh: “Nuk kam çfarë them për Verstappenin sepse e patë vetë të gjithë. Garat kështu e kanë. Janë gjëra që ndodhin dhe ishte diçka negative për të dy”.
Me vendin e tetë, Vettel ruan kryesimin e Botërorit të Formula 1 me 54 pikë, 9 më shumë sesa Lewis Hamilton, i cili e përfundoi garën në vendin e katërt. Ricciardo fitoi Çmimin e Madh të Kinës duke lënë pas Bottas e Raikkonen.
