Një familje është aksidentuar në orët e para në Vlorë, ku për fat të keq ka humbur jetën një fëmijë 6- vjeç. Aksidenti ka ndodhur rreth orës 04:45, në aksin rrugor Fier-Vlorë, në afërsi të fshatit Panaja, ku mjeti tip “Benz” ka dalë nga rruga dhe është përplasur me bordurën anësore. Për shkak të përplasjes ka humbur jetën një fëmijë 6 vjeç dhe janë plagosur babai, nëna dhe motra 3 vjeçe, të cilët ndodhen në spitalin e Vlorës.
“Benzi” është kthyer përmbys pasi është përplasur me tabelat dhe barrierat mbrojtëse të rrugës, ndërsa pas përplasjes nuk i mbijetoi dot fëmija i tyre vetëm 6 vjeç.
Në rrugë janë shpërndarë copa të makinës, e cila është përplasur dhe me bordurën anësore duke e shkatërruar.
Drejtuesi i mjetit me bashkëshorten dhe fëmija tjetër vetëm 3 vjeçe, tashmë ndodhen në spitalin e Vlorës nën kujdesin e mjekëve, por nuk dihet gjëndja e tyre.
Në vendngjarje ndodhet grupi hetimor, i cili po kryen veprimet e mëtejshme në lidhje me sqarimin e rrethanave të aksidentit.
