Në shtëpinë zikaltër ka ankth, blerja më e re dhe më e bujshme e tyre pëson aksident. Bëhet fjalë për Radja Nainggolan i cili vetëm pak ditë më parë ka firmosur me Interin, duke lënë Romën për tu bashkuar me ish-trajnerin Spalletti. Mesfushori belg ka pësuar një aksident me makinën e tij Ferrari GtC 4 Lusso.Nainggolan ishte nisur nga Roma për në Milano, ku do të akomodohej përfundimisht pasi të hënën nis edhe faza përgatitore për sezonin e ri. Vetëm pak kilometra pasi ishte nisur, makina e belgut ka shpuar një gomë dhe është përplasur me murin rrethues të autostradës, duke shkaktuar dëme të mëdha makinës në pjesën e pasme dhe anësore.
Fatmirësisht sipas mediave italiane vetë futbollisti nuk ka pësuar asnjë lëndim, duke lehtësuar frikën që ekzistonte te Inter dhe çdo i njohur i futbollistit. Për aksidentin Nainggolan ka thirrur menjëherë policinë rrugore. Mesfushori është shoqëruar në Prato, ku koncesionari i Ferrari-t i ka dhënë një makinë zëvendësuese.