Pesë persona janë plagosur mbrëmjen e djeshme, pasi janë përfshirë në një aksident. Aksidenti, pa pasoja për jetën është shënuar mbrëmjen e së shtunës, në aksin rrugor Elbasan-Tuneli i Kërrabës, në vendin e quajtur Mamël. Në aksident janë përfshirë të paktën katër automjete.
Nga përplasja mes tyre një autoveturë është përmbysur, ndërsa tre të tjera janë dëmtuar pjesërisht. Burimet kanë bërë me dije se tre persona kanë marrë plagë të rënda, ndërsa dy të tjerë dëmtime të lehta.
Të njëjtat burime shtojnë se të aksidentuarit janë shtetas polakë, dhe se gjendja e tyre është nën mbikëqyrjen e ekipit mjekësor të Spitalit të Elbasanit. Nuk dihen ende rrethanat në të cilat ka ndodhur aksidenti. Paraprakisht dyshohet se shkak i aksidentit është ngushtimi i rrugës në zonën ku ka ndodhur rrëshqitja e masivit shkëmbor, në fillim të këtij viti në Mamël.
