Kreu i BDI-së, Ali Ahmeti beson se partia e tij do të fitojë shumicën e komunave shqiptare, duke marrë më shumë vota se në zgjedhjet e kaluara.
Rënien në zgjedhjet parlamentare të vitit të kaluar, Ahmeti e konsideron një “stuhi të rrezikshme”, ku humbën pothuajse 8 mandate.
“Tani më 15 tetor, në Maqedoni organizohen zgjedhjet lokale. Pres një kthesë pozitive dhe kjo shihet gjatë takimeve që kam me elektoratin, me votues e simpatizantë të Bashkëpunimit Demokratik për Integrim. Ka një kthesë të mirë krahasuar me zgjedhjet e 2016-s, tani kemi një frymë shumë pozitive. Zgjedhjet parlamentare të 2016-s ishin një stuhi goxha e rrezikshme dhe për pasojë humbëm gati tetë mandate. Nuk i fitoi asnjë parti politike shqiptare ato tetë mandate, por pas çdo stuhie ka edhe viktima, ka edhe pasoja. Si duket ne mbijetuam në këtë stuhi, qytetarët e kuptuan që Bashkimi Demokratik për Integrim është i interesuar për avancimin e çështjeve në Republikën e Maqedonisë, në të gjitha fushat, dhe në veçanti në afrimin e komunitetit shqiptar”, tha Ahmeti në një intervistë për KosovaPress.
Më tej, Ahmeti parashikon se partia e tij do të udhëheqë me 16 komuna, nga 18 komuna shqiptare gjithsej në Maqedoni.
Madje, ai vlerëson se në së paku pesë komuna do të fitojnë që në raundin e parë, ndërsa në të tjerat presin të fitojnë në raundin e dytë.
Kreu i BDI-së thekson se shqiptarët në Maqedoni janë “viktima” të përçarjeve në shumë parti shqiptare, teksa tha se nuk është e nevojshme të ketë më shumë se 2 parti të tilla:
“Jo rastësisht në mënyrë alegorike thashë nga stuhia që pësuam pati viktima dhe viktimë ishin shqiptarët me 8 mandate. Shqiptarët janë viktimë e atyre përçarjeve në shumë parti të shqiptarëve këtu në Maqedoni. E them përsëri, shqiptarët nuk mund të kenë me shumë se dy parti dhe ekzistenca e veprimtarisë së partisë së tretë apo të katërt, është po aq e dëmshme sa të ketë një parti. Dy parti le të jenë në garë, pozitë-opozitë dhe do ishte e natyrshme që ne do të ishim në pozita shumë me të volitshme edhe për përballje me palën, me të cilën jemi në vazhdimësi jemi në konfrontim”, tha Ahmeti.
Kryetari i BDI-së Ali Ahmeti, megjithatë ka bërë thirrje për zgjedhje të qeta dhe dalje sa më masive të qytetarëve për të shfrytëzuar të drejtën e tyre për të votuar.
