Ministri i Ekonomisë dhe Financave, Arben Ahmetaj ka dalë sot në një konferencë për mediat. Ashtu siç kishte njoftuar kryeministri Rama, Ahmetaj tha se kishte nxjerrë një urdhër për të gjitha institucionet në varësi të Ministrisë së Financave, që mos t’u kërkojnë qytetarëve 13 dokumente.
“Kam nxjerrë një urdhër për të gjithë institucionet në varësi të Ministrisë së Financave, që mos t’u kërkojnë qytetarëve 13 dokumente, pasi është detyrë e institucionit t’i nxjerrë dokumentet nëpërmjet portalit e-albania, duke filluar që nga certifikata. S’është nevoja ta kenë me vete, duhet ta ketë institucioni online. Vërtetim për sigurimet shoqërore e shëndetësore, s’është nevojë ta ketë dhe as vërtetim për përgjegjësinë tatimore”.
Nga ana tjetër, ministri u shpreh mjaft pozitiv për rritjen ekonomike, ndërsa siguroi se papunësia do të ulet nga 13,9% në një shifër njëshifrore.
“Kemi shifra mjaft pozitive porsa i përket rritjes ekonomikë, e cila nga 3,7 është rritur në 3,9%. Papunësisë vazhdon me një nivel konstant 13,9%, sfida e punësimit një nga sfidat kryesore te qeverisë Rama 2.
Nuk ka arsye për të qenë të kënaqur me shifrat, megjithatë papunësinë do e zbresim nëpërmjet rritjes së ekonomisë dhe rritjes së punësimit. Papunësinë do e zbresim në shifër njëshifrore.”
Gjithashtu, ministri tha se qeveria do të punojë për rritjen e investimeve të huaja në vendin tonë, të cilat aktualisht arrijnë në 25% nga totali i investimeve në rajon.
“Konsolidimi fiskal, ulja e borxhit një nga arsyet kryesore që jemi në referencë shumë pozitive nga agjencitë e punësimit. Shqipëria tërheq 25% të investimeve të huaja në rajon, është në nivel goxha të kënaqshme.
Kemi një sfidë specifike pasi do duhet të punojmë humb intensivisht që të tërheqim investime të huaja serioze në nivel prodhues.
Kjo është një sfidë shumë e rëndësishme që qeveria “Rama 2” ka përpara.
Vazhdojmë tërheqjen e investimeve në sektorin energjetik, krahasimin me Maqedoninë mos ma përmendni më, jo ju të paktën ata në parlament le ta përmendin.
Marrëveshjet e mëdha nuk bëhen për hatër të kryeministrit, por në favor të vendit. Marrëveshja e 18 majit ka shumë efekte pozitive, zgjedhje të qeta dhe kthimi i besimit të aktorëve. Aktualisht kemi nivelin më të ulët të kredive të këqija, në 15.8%. Ulje me 10% nga viti 2013 kur e morëm”, tha ndër të tjera Ahmetaj./ Tirana Today
