Qeveria aktuale, nëse do të vijojë të drejtojë vendin edhe pas zgjedhjeve të pritshme parlamentare, pritet të ketë shtyllë kryesore të zhvillimit të ekonomisë, taksën progresive.
Ministri i Financave, Arben Ahmetaj, sot gjatë një bashkëbisedimi me gazetarë, e konsideroi aplikimin e “taksës së ndershme”, aq të kundërshtuar nga e djathta, si një ndër politikat me ndikimin më të madh në rritjen e nivelit të ekonomisë përgjatë mandatit 4-vjecar, cka do të thotë vijimësi të kësaj praktike, nëse socialistët do të fitojnë dhe një mandat qeverisës.
Ahmetaj deklaroi gjithashtu se, “për herë të parë pas 5 vitesh kemi një rritje ekonomike që u shënua në 3-mujorin e parë 2017, në vlerën e 2.96 %”.
Kreu i Financave ndër të tjera vlerësoi si domosdoshmëri miratimin e reformës në drejtësi, cka sipas tij do të shërbejë si një tjetër frymëmarrje për ekonominë shqiptare, tashmë të dalë nga kriza e thellë nga ku u trashëgua katër vite më parë.
Duke iu referuar një prej pikave të forta që opozita ka në programin e saj për ekonominë, taksës së sheshtë, Ahmetaj theksoi se “aplikimi i saj do t’u hiqte shqiptarëve nga xhepat plot 500 milion dollarë në vit”.
