Agjencia Evropiane e Barnave (EMA), deklaroi se Bashkimi Europian duhet të përdorë të gjitha llojat e vaksinave kundër koronavirusit, për të luftuar pandeminë.
Kjo deklaratë nga EMA, vjen pasi disa shtete kanë ndërprerë vaksinimet me dozat e prodhuara nga kompanitë AstraZeneca dhe Johnson & Johnson, për shkak të rasteve të mpiksjes së gjakut në disa pacientë, shkruan Barrons.
“Ne jemi akoma në një pandemi dhe është shumë e rëndësishme që në këtë luftë kundër të përdorim të gjitha opsionet që kemi në dispozicion,” tha Marco Cavaleri, shefi i strategjisë së vaksinave të EMA, në një konferencë për shtyp.
Eksperti i EMA-s shtoi se është shumë e vështirë të thuhet se cili lloj i teknologjisë me të cilën prodhohen vaksinat mund të rezultojë më i suksesshëm në të ardhmen. Sipas tij, të gjitha vaksinat ekzistuese tashmë kanë shpëtuar miliona jetë. EMA ka autorizuar për përdorim katër vaksina: Pfizer/BioNTech, Moderna, AstraZeneca dhe J&J.
