Qeveria ka miratuar këtë të mërkurë projekligjin që i hap rrugën nisjes së negociatave për kontratën e ndërtimit të Aeroportit të Vlorës. Lajmin e ka bërë të ditur vetë Kryeministri Edi Rama, i cili në një postim në rrjetet sociale, shkruan:
“Qeveria miratoi projektligjin për nisjen e negociatave për kontratën e ndërtimit të aeroportit të Vlorës. Së shpejti shpresoj dhe Kukësin”.
Pak ditë më parë, kreu i qeverisë njoftoi dorëzimin e kërkesës zyrtare nga një bashkim kompanish turke për të ndërtuar aeroportin e Vlorës. Oferta u bë nga konsorciumi i tre kompanive turke: Cengiz Construction; Kalyon Construction dhe Kolin Construction.
Sipas propozimit, aeroporti do të ndërtohet në zonën e Akernisë në afërsi të qytetit të Vlorës. Vlera e investimit është 98 milion euro dhe e gjitha do të jepet nga operatori privat e jo nga buxheti i shtetit. Më pas menaxhimin e aeroportit do ta ketë grupi investitor ndërsa qeveria do t’i garantojë rrezikun e fluksit të fluturimeve. Forma e kontratës do të jetë sipas formulës Partneritet Publik – Privat.
Ndërsa më tej Rama shkruan
ERTV Live?: AEROPORTI I VLORËS një zhvillim strategjik për #ShqipërinëqëDuam????- Gjatë mandatit të parë, programi i rilindjes së Shqipërisë aeroportuale shënoi zhvillimin e parë pozitiv me heqjen e ekskluzivitetit të aeroportit të Rinasit e hapjen e rrugës për të tjera aeroporte në territorin e vendit tonë.
Tanimë po hedhim një hap të madh me zhvillimin konkret të idesë së aeroportit të ri ndërkombëtar të Vlorës, cili sipas të gjitha gjasave do të nisë të ndërtohet brenda qershorit të këtij viti.
Sot, qeveria miratoi projektligjin për çeljen e negociatave për kontratën e ndërtimit e të operimit të aeroportit të Vlorës. Po punohet edhe për të krijuar një bazë serioze kushtesh që të shkohet në të njëjtin drejtim me aeroportin e Kukësit, i cili ka një strukturë e profil të ndryshëm nga ai i Vlorës. Me këto dy aeroporte, si edhe me aeroportin turistik të Sarandës, do të përmbushej programi i rilindjes se Shqipërisë aeroportuale dhe besojmë fort se brenda këtij mandati të ri, Kështu do të ndodhë?✌
