Administratori i Dropullit fajëson forcat RENEA për vrasjen e shtetasit Kostandinos Kaçifa. Sipas tij, opinioni publik është i indinjuar pasi 35-vjeçarin mund ta kishin kapur të gjallë dhe nuk kishin përse ta vrisnin.
“Duhet të hetohet ngjarja, forcat speciale mund ta nxirrnin të gjallë. Fshati është i indinjuar, sepse atë mund ta zinin të gjallë. Mund të mënjanohej vrasja”, ka thënë administratori. Më tej, ai shtoi se nuk ka detaje për ngjarjen, ndërsa theksoi se situata është shumë e rëndë.
“Hollësira nuk di si ka ndodhur. Ne erdhëm në familje për t’i qëndruar pranë familjes. Atmosfera është shumë e rëndë, njerëzit nuk flasin kollaj. Është një ngjarje e rëndë për të gjithë Dropullin. Nuk ka ndodhur asnjëherë tjetër një ngjarje e tillë”, deklaroi administratori.
Administratori thotë se 35-vjeçari nuk ishte një person problematik, ndërsa theksoi se ai çdo vit merrej me zbukurimin e fshatit për 28 tetorin.
