Administrata e Presidentit Joe Biden në SHBA, ka deklaruar për televizionin T7, se qeveria e Kosovës e dejtuar nga Albin Kurti, duhet ta respektojë marrëveshjen e firmosur në Uashington.
Kurti ka shprehur gjithmonë rezervat e tij për marrëveshjen e firmosur në Shtëpinë e Bardhë nga paraardhësi i tij Avdullah Hoti, dhe Presidenti i Serbisë Aleksandër Vuçiç.
Më herëtpara zgjedhjeve, Kurti ka deklaruar see vetmja pikë e vlefshme, është vendosja e raporteve dhe njohja reciproke me Izraelin, madje thoshte se “nëse ai do ta rimarrë sërish udhëheqjen e qeverisë, nuk do të jetë i obliguar ta zbatojë marrëveshjen e Uashingtonit”.
Të njëjtin qëndrim, ai po e mban edhe tashmë që mban postin e kryeministrit. Pak ditë më parë, zëdhënësi i Kurtit deklaroi se marrëveshja e Uashingtonit nuk ka vlerë juridike, dhe është jo legjitime. Kjo deklaratë nxiti reagime të shumta, sidomos nga opozita kosovare.
Çfarë deklaroi zëdhënësi i Kurtit
Zëdhënësi i Qeverisë së Kosovës, Perparim Kryeziu deklaroi se marrëveshja e firmosur në Uashington midis Kosovës dhe Serbisë nuk ka legjitimitet, pasi dokumenti nuk është dërguar asnjëherë në Kuvend.
Kryeziu u shpreh se marrëveshja midis dy vendeve është nënshkruar nga Qeveria Hoti, që sipas tij ishte jo legjitime.
Ndër të tjera, ai tha se janë në kontakt me SHBA-në për të punuar së bashku për temat të cilat kanë interes të përbashkët.
“Për ta përsëritur një qëndrim të kamotshëm të kryeministrit Kurti më duhet të them se së pari ai dokument nuk e ka vlerën dhe natyrën juridike të një marrëveshjeje për shkak se asnjë nuk është sjellë në Kuvend as për t’u diskutuar as për ta marrë mbështetjen e Kuvendit dhe si i tillë me të drejtë është quajtur si dokument me zotime të njëanshme të një Qeverie e cila në kohën e nënshkrimit të këtij dokumenti ishte pa legjitimitet dhe më pastaj në ndërkohë u pat vërtetuar se nuk gëzon ligjshmërinë e nevojshme për të qenë në Qeveri. Përtej asaj ne jemi në kontakt me ShBA-në për të punuar së bashku për temat të cilat kanë interes të përbashkët”, tha Kryeziu.
