Uniformat blu kanë zhvilluar një tjetër aksion, duk bërë të mundur arrestimin e disa personave, që akuzohen për korrupsion. Më konkretisht, Policia e Shkodrës ka ndaluar juristin e Hipotekës së këtij qyteti, dhe tre persona të tjerë nën akuzën e ‘korrupsionit pasiv’. Korrupsioni në Hipotekën e Shkodrës ka çuar në pranga dy persona, dhe dy të tjerë janë ndaluar.
Mes të arrestuarve është edhe juristi i Hipotekës dhe njëherazi anëtar i Këshillit Bashkiak, si dhe një person tjetër për ndikim të paligjshëm. Referuar deklaratës për media nga ana e policisë, mësohet se këto masa janë dhënë me urdhër të Prokurorisë së Shkodrës, për abuzim me pronat.
Policia ka bërë ndalimin e Mirjan Bletajt, këshilltar i Bashkisë Shkodër, nën siglen e PS, i cili ka kaluar pak muaj më parë në radhët e LSI-së, njëherazi edhe jurist i zyrës së regjistrimit të pasurive të paluajtshme si dhe Sokol Tirana. Ndërsa dy persona të tjerë, Joan Zefi dhe Ndoc Tara janë prangosur me akuzën e ‘ndikimit të paligjshëm te funksionarëve publikë’.
Njoftimi i Prokurorisë:
Prokuroria e Rrethit Gjyqësor Shkodër ka regjistruar kryesisht procedimin penal nr.607, lidhur me veprat penale të parashikuara nga nenet 245/1, paragrafi i dytë dhe 259 të K.Penal.
Në kuadër të këtij procedimi penal, me datë 20.09.2018, janë ndaluar me urdhër të Prokurorisë së Rrethit Gjyqësor Shkodër të dyshuarit:
Mirjan Bletaj, me detyrë jurist pranë ZVRPP Shkodër, i dyshuar për veprën penale të parashikuar nga neni 259 i K.Penal;
Sokol Tirana, i dyshuar për veprën penale të parashikuar nga neni 245/1, prgr.2;
Si dhe janë arrestuar në flagrancë të dyshuarit:
Joan Zefi, i dyshuar për veprën penale të parashikuar nga neni 245/1, prgr.2;
Ndoc Tara, i dyshuar për veprën penale të parashikuar nga neni 245/1, prgr.1;
