Ledina Mandija, zëvendëskryeministrja që sapo është dorëhequr ka dërguar në prokurori një raport mbi punësimet e 3600 personave gjatë fushatës zgjedhore. Mandija ka kërkuar vlerësimin e çështjes për të vijuar më pas dhe me procedimin hetimor.
Kyetari i PD-së, Lulzim Basha i cilësoi ministrat teknik të qeverisë Rama të sabotuar, ai thotë se ata u lanë pa fonde.
Raporti i ministrave teknikë për zgjedhjet e 25 qershorit cilësohet nga qeveria si jo korrekt dhe i paligjshëm.
Ledina Mandija, nuk është dakord aspak me këtë pretendim të qeverisë, prandaj ka vënë në dispozicion dokumentet përcjellëse të raportit që kryeministria ka firmosur dhe protokolluar dy ditët e fundit nga vetë Protokolli i Këshillit të Ministrave, çka sipas zonjës Mandija rrëzon tezën se raporti është jo legjitim dhe i pa zyrtarizuar.
Në dispozicion janë vënë 4 dokumente, nga të cilat rezulton se nga një kopje e raportit i është përcjellë koalicionit të vëzhguesve vendorë, ministrave si dhe të gjitha subjekteve zgjedhore, në datën 17 gusht 2017, me numër protokolli 4426. Gjithashtu, me të njëjtin numër protokolli, përmbledhja për zgjedhjet e 25 qershorit u është përcjellë përfaqësuesve ndërkombëtarë dhe mban datën 16 gusht.
Sipas Mandija, firmosja dhe përcjellja zyrtare e kësaj përmbledhjeje, tregon të kundërtën e asaj që pretendon qeveria.
Pritet qeë partia Socialiste të mbledhë asamblenë e saj më 27 gusht, ku do të diskutohen zgjedhjet e 25 qershorit, por po ashtu dhe strategjia për mandatin e dytë qeverisës.
Raporti i plotë është publikuar të enjten e 17 gushtit edhe zyrtarisht për mediat, pak orë pasi zv.kryeministrja dhe 6 ministrat teknikë kanë dhënë dorëheqjen.
