Në kuadër të turit të tij dëgjesave me qytetarët kryeministri Rama ka rrëfyer gjithë strategjinë e tij të pastrimit të administratës shtetërore nga ata që kanë abuzuar me detyrën.
Duke iu drejtuar qytetarëve të Durrësit, Rama vuri në dukje se ata që kanë abuzuar përgjatë këtyre viteve në shërbimin e zyrave të shtetit do të largohen një herë e mirë nga administrata. Rama sulmoi indirekt Lëvizjen Socialiste për Integrim duke e cilësuar si shushunjë që ka mbajtur peng gjithë shërbimin e zyrave të shtetit.
Ai sulmoi drejtorët e LSI-së dhe punonjësve që janë pjesë e kësaj force politike, të cilët Rama i cilësoi si “policia gri”, që vendosin gjoba në çdo institucion apo inspektorat që drejtonin. “Ishte njëri madje, që më çoi edhe mua SMS: ‘Voto 1-shin që të jesh i lumtu”. Këta shushunja do të largohen”, tha Rama.
Rama shpjegoi se ata që abuzojnë me detyrën në administratën shtetërore do të largohen për 10 vite në mos përgjithmonë nga detyra e zyrave të shtetit.
‘‘Ata që abuzojnë me detyrën do të largohen nga shërbimet e administratës për 10 vite, në mos përgjithmonë. Ne do të kemi shumë rezistencë dhe reaksion sepse faktikisht do të marrim përsipër të bëjmë dhe të shembim murin e kështjellës së privilegjeve të katundit të tyre ku jetojnë. Ndryshe do të isha në ndonjë zyrë duke parë tepsinë dhe duke dëgjuar të tjerët se çfarë pjese të tepsisë donin. Për ata që do të bashkohen kundër kësaj gjëje, për të cilën nuk flasin, do të fillojë Vettingu. Do të jetë një bashkim i fortë interesash. Na ruajt Zoti mendtë e kokës kush ankohet për oligarkinë, për zgjedhjet. Ne që e dimë nga brenda si funksionon është që të themi na ruaj o Zot!”, u shpreh Rama iu duke iu referuar LSI-së.
