Ish-Ministri i Drejtësisë, Ylli Manjani, ka dhënë një përgjigje të argumentuar nëse zëvendësministri Sandër Lleshi mund të bëjë detyrën e ministrit. Ai që në krye të herës thotë se duhen mbajtur në konsideratë tre ligje kryesore. Ato janë Kushtetuta e Republikës, Ligji Për Organizimin dhe Funksionimin e Këshillit të Ministrave dhe Kodi i Proçedurave Administrative.
Duke iu referuar nenit 106 të Kushtetutës, Fatmir Xhafaj është ende ministër, deri sa të betohet ministri i ri. Edhe pas miratimit të dekretit të shkarkimit të tij nga Kuvendi, ai duhet të qëndrojë në detyrë deri sa të vijë ministri i ri, jo zëvendësministri i ri.
Manjani citon më tej se neni 6 i Ligjit për Këshillin e Ministrave në relacion me nenin 34 të Kodit të Proçedurave Administrative, sqarojnë se një zëvendësministër mund të kryejë përkohësisht detyrën e ministrit, kur ky i fundit është i pamundur për ta kryer vetë. Por kjo ndodh përkohësisht.
Ylli Manjani vë në dukje se ka disa detyra që nuk mund ti kryejë zëvendësministri, as me autorizim. Zv/Ministri nuk mund të votojë në qeveri ashtu siç nuk mund të ulet në podiumin e ministrit në Kuvend. Sepse për tu ulur aty, duhet të jesh emëruar ministër, sipas proçedurës kushtetuese: Kryeministër-President-Kuvend.
