Ish-ministri i Drejtësisë, Ylli Manjani, i cili është përfolur për një kandidim të mundshëm në Bashkinë e Tiranës, ka reaguar në lidhje me këto zëra.
Ai sqaron se deri më sot nuk ka patur asnjë propozim zyrtar, nga asnjë forcë politike, sa i përket kandidimit të tij për postin e kryetarit të Bashkisë së Tiranës. Po kështu, Manjani vë në dukje se ka patur shumë njerëz, të cilët e kanë menduar këtë gjë. Në këtë grup bën pjesë dhe kryetarja e LSI, Monika Kryemadhi. Kjo mbetet në kuadrin e një dëshire, dhe jo një propozimi zyrtar.
Me anë të një postimi në Facebook, Ylli Manjani shkruan se Tirana prej vitit 2000 ka qenë peng i kryetarëve me axhendë politike. Kjo “pengmarrje”, sipas tij, ka dëmtuar qytetin, i cili është mbushur me ndërtime kuturu, ose është lënë pa financim e pa kontroll, për shkak të debatit politik.
