Kryeministri Edi Rama është treguar i prerë lidhur me fatin e kazinove dhe basteve online.
Gjatë fjalës së tij në seancën e sotme, Rama tha se është kundër një monopoli shtetëror, por mbetet i hapur për diskutime.
Megjithatë, ai është i vendosur që më 1 janar nuk do ketë më asnjë lloj basti.
Por, a do të spostohen në periferi lojërat e fatit?
Rama bëri me dije se nuk ka asnjë spostim në periferi, ndërsa të vetmet vende ku mund të luhet, janë kazinotë të cilat do jenë vetëm në hotele me 5 yje.
Kryeministri akuzoi opozitën se po sulmon qeverinë duke shpifur mbi një monopol online.
Fjala e Ramës:
Do të arrijmë në një konkluzion të studiuar lidhur me bastet online. Ka propozime të ndryshme sa i përket idesë të një monopoli shtetëror, por unë jam kundër. Janë të gjitha të hapura për diskutim. Më 1 janar nuk ka më asnjë lloj basti, asnjë kazino në asnjë vend. S’ka as spostim në periferi. Kazinotë do jenë të mundura vetëm në hotelet me 5 yje në zona turistike me vendim të qeverisë. Asnjë lëshim në asnjë hapësirë tjetër.
Ata që sot mungojnë janë në krahun e atyre që po luftojnë online dhe që po agresojnë një pjesë të deputetëve të shumicës me mesazhe. Bashkë me kazinotë, edhe bastet e të gjitha llojeve. Ata që shpifin për një monopol online, ta mbajnë për vete llumin. E fokusojnë sulmin tek një monopol online. 68% e lojtarëve aktivë të basteve kanë nisur aktivitetin në moshën 10-15 vjeç. Kjo është koha kur fillon formimi i këtyre lojtarëve. Kjo është arsyeja pse Franca ka ndaluar çdo sallon hapjesh bastesh. Qeveritë kombëtare lejohen ta kufizojnë lojërat e fatit për interesin publik dhe kërcënim të sigurisë kombëtare që këtë aktivitet e merr në dorë krimi i organizuar.
Një në 4 lojtar ka pranuar se i ka shkuar në mendje të vetëvritet.
