Nga: Roland Qafoku
Cili është sporti më popullor në botë? Kjo është një hartë që na tregon se me afeksionin ndaj futbollit ne shqiptarët jemi si gjithë Evropa, Afrika dhe Amerika e Jugut.
Të paktën përgjatë 120 viteve të fundit, rezulton se futbolli është sporti më i ushtruar, më i preferuar, më popullor dhe më rezultativi në aspektin masiv. Megjithatë, edhe pse kemi afeksion duhet të themi nuk jemi konkurues në nivele të larta. Mbetemi modestë dhe arritja më e madhe e Shqipërisë është pjesëmarrja e kombëtares në Kampionatin Evropian të vitit 2016 në Francë.
Pra, nga 16 kampionate evropiane, ne kemi marrë pjesë vetëm në një. Ndërsa të 22 kampionatet botërore i kemi parë me dylbi duke përfshirë edhe këtë aktualin që po zhvillohet në Katar.
Disa arritje të klubeve mbeten po modeste dhe sado ne mund ti përmendim me mburrje naive, nuk llogariten fare në klasifikimet ndërkombëtare. Mbetet proverbiale thënia e Gianni De Biasi-t se shqiptarët janë një popull që e duan shumë futbollin, por nuk dinë të luajnë futboll.
Ndërkohë, këto sportet e tjera që shfaqen në hartë edhe i kemi frenkuentuar veçanërisht basketbollin por pa arritur rezultate konkuruese. Habia më e madhe është se në vitin e largët 1916 jo vetëm kemi luajtur basketboll, por kishim edhe kombëtare të këtij sporti edhe pse jashtë kufijve tanë. Dhe të mendosh se është një lloj sporti që as bëhet fjalë të ushtrohet sot. Besoj se vetëm Ice Hockey dhe Cricket janë të vetmet sporte që ne shqiptarët nuk i kemi ushtruar. Me këtë hartë dhe me këto të dhëna na mbetet të thërrasim vetëm: Rroftë futbolli!
