Sekretari i Përgjithshëm i NATO-s, Jens Stoltenberg dhe Sekretari i Mbrojtjes i SHBA-së, Lloyd Austin, përsëritën mbështetjen e tyre për Ukrainën, përpara një takimi të ministrave të mbrojtjes të NATO-s në Bruksel të enjten.
“Ne ende qëndrojmë pranë Ukrainës, për aq kohë sa duhet. Ne do të shtojmë mbështetjen tonë dhe në veçanti do të ofrojmë më shumë ndihmë për mbrojtjen ajrore të Ukrainës”, tha Stoltenberg në Bruksel së bashku me Austin.
Stoltenberg vlerësoi të mërkurën miratimin nga Asambleja e Përgjithshme e OKB-së të një rezolute që i thotë Rusisë, se aneksimi i saj i katër zonave ukrainase është i paligjshëm dhe jo i vlefshëm, duke e quajtur votimin një “dënim të qartë të aneksimit të paligjshëm të territoreve ukrainase dhe një thirrje të qartë ndaj Presidentit rus Vladimir Putin të anulojë këto vendime, dhe të respektojë integritetin territorial të Ukrainës”.
“Unë jam absolutisht dakord me ju … dhe nuk mund ta kisha thënë më mirë”, tha Austin, duke përsëritur se SHBA do të vazhdojë të mbështesë Ukrainën “për aq kohë sa të duhet”.
“Dua të duartrokas të gjithë aleatët dhe partnerët tanë, të cilët janë ngritur për të ofruar ndihmë për Ukrainën”, tha Austin.
“Kjo aleancë është forumi thelbësor për konsultim, vendimmarrje dhe veprim kur bëhet fjalë për sigurinë e rajonit dhe sigurinë transatlantike gjithashtu”.
Austin ripohoi përkushtimin e Uashingtonit ndaj nenit 5 – parimi se një sulm ndaj një anëtari të NATO-s është një sulm ndaj të gjithë anëtarëve – dhe për “mbrojtjen e çdo centimetër të territorit të NATO-s”.
Burimi i lajmit: CNN. Përshtatur nga Tirana Today
