Një 34-vjeçar është gjetur pa ndjenja nga shoku i tij në llixhat e Elbasanit. Aventura e dy të rinjve nga Tirana ka përfunduar në tragjedi, ku humbi jetën 34-vjeçari i identifikuar si Alban Pashollari, teksa lahej në ujërat termalë. Shoku i cili e shoqëronte deklaroi në polici se kishin konsumuar birra para se të hynin në mënyrë klandestine në vaskën e një hoteli gjatë mbrëmjes të së enjtes, rreth orës 22:00. Autoritetet njoftuan se shkak i vdekjes është arresti kardiak.
Ai u gjend në vaskën e një hoteli në gjendje të rëndë, pa ndjenja nga shoku me të cilin kishte udhëtuar nga Tirana drejt llixhave.
“Hëngrëm darkë në Tiranë dhe u nisëm për në llixhat e Elbasanit. Shkova të thërras Albanin, e shoh në gjendje gjumi. Tentova t’i jepja ndihmën e shpejtë dhe më pas erdhi ambulanca”, tha miku i tij, Etjen Brahimaj në cilësinë e dëshmitarit.
Burimet policore bënë të ditur se dy të rinjtë nga Tirana, parkuan automjetin pranë hotelit rreth orës 22:00, dhe duke qenë sporteli i mbyllur qëndruan në lulishte dhe u lanë në vaskën me ujëra termalë. Alban Pashollari pësoi arrest kardiak, dhe ndërroi jetë rrugës për në spitalin e Elbasanit.
Njoftimi nga policia
Në fshatin Llixhë, Elbasan, pranë një rezervuari të mbushur me ujë termal, është gjetur në gjendje të rëndë shëndetësore, pa shenja dhune, shtetasi A. P., 34 vjeç, banues në Tiranë, i cili ka humbur jetën gjatë transportimit me autoambulancë, për në spital. Paraprakisht dyshohet se ky shtetas ka humbur jetën për shkak të arrestit kardiak. Grupi hetimor po punon për dokumentimin e plotë të rrethanave të ngjarjes.
