Presidentja e Komisionit Evropian, Ursula von der Leyen, propozoi masa të reja të gjera të mërkurën, duke përfshirë një “objektiv të detyrueshëm për reduktimin e përdorimit të energjisë elektrike në orët e pikut”.
Propozimet u prezantuan me qëllimin për të ndihmuar qytetarët evropianë, të përballen me rritjen e kostove të energjisë pasi veprimet e Rusisë në “manipulimin aktiv të tregut të gazit” dhe efektet e ndryshimeve klimatike shkaktojnë rritje të çmimeve.
Duke folur për gazetarët në Bruksel, von der Leyen tha se Bashkimi Evropian ka “rritur shumë gatishmërinë tonë dhe ne kemi dobësuar kontrollin që Rusia kishte mbi ekonominë dhe kontinentin tonë” gjatë gjashtë muajve të fundit.
Ajo prezantoi pesë masa, me synimin për të mbështetur “konsumatorët dhe bizneset e cenueshme”. Si pjesë e masave, von der Leyen njoftoi se BE-ja “do të propozojë një kufi për gazin rus”.
“Objektivi këtu është shumë i qartë”, tha ajo. “Ne duhet të shkurtojmë të ardhurat e Rusisë, të cilat Putini i përdor për të financuar këtë luftë mizore kundër Ukrainës”.
Masat e mëtejshme përfshijnë një “objektiv të detyrueshëm për reduktimin e përdorimit të energjisë elektrike në orët e pikut”, për të ndihmuar në “rrafshimin e pikut dhe një kufi mbi të ardhurat nga energjia për kompanitë që përdorin burime të rinovueshme”.
Për më tepër, komisioni do të “propozojë një kontribut solidariteti për kompanitë e karburanteve fosile” që do të shohë “fitime të papritura” nga kompanitë e energjisë që përdoren për të mbështetur konsumatorët dhe bizneset.
Pesë masat e propozuara do t’u vendosen vendeve anëtare të premten, sipas von der Leyen.
Burimi i lajmit: CNN. Përshtatur nga Tirana Today
