Avokatja e Faruk Ozer është shprehur se klienti i saj i ka dëmshpërblyer një pjesë të personave që kanë investuar në kriptovaluta. Sipas saj, ai “nuk është personi përgjegjës për ato që e akuzojnë”.
“Shuma e cila mendohet që Faruk Ozër ka marrë, është gënjeshtër”, u shpreh avokatja.
Lidhur me vendimin e gjykatës e cila e la në burg bosin turk të kriptomonedhave, ajo tha se do të apelohet. Avokatja i mëshoi faktit se në mediat shqiptare dhe ato turke, thuhen vetëm gënjeshtra për akuzat ndaj tij dhe se Faruk Ozer nuk është përgjegjës për krimet që e akuzojnë.
“Bëhet fjalë vetëm për politikë. Në mediat shqiptare dhe ato turke thuhen gënjeshtra për akuzat ndaj tij. Ne mund të themi se Prokuroria e Turqisë dhe institucionet atje thuhet se dëmi është 20 mln dollarë dhe jo 2 miliard dollarë siç thuhet në media.
Ai nuk është personi përgjegjës për ato krime që e akuzojnë. Nga 20 mln dollarë dëm, gjysma e tyre i janë kompensuar familjeve. Dhe gjysma e familjeve të dëmtuara i kanë tërhequr pretendimet. Ka arsye politike. Ai erdhi si biznesmen në Shqipëri, erdhi për të investuar”, tha avokatja.
Për më shumë se 1 vit, ai u strehua në Shqipëri deri kur ra në rrjetën e përgjimeve dhe vëzhgimeve të Prokurorisë e Policisë së Elbasanit. Ai u arrestua të martën në Himarë, ku po qëndronte me pushime bashkë me dy persona të tjerë nga Shqipëria, të cilët dyshohet se e ndihmuan të fshihej në vendin tonë.
