Mbrëmjen e djeshme, një turiste italiane ka humbur ndjenjat në shëtitore, dhe ndihma e parë i ka ardhur nga kryebashkiaku i Sarandës Adrian Gurma, i cili i është kthyer profesionit të mjekut. Kjo situatë është shënuar rreth orës 23:30 të ditës së djeshme në shëtitoren e Sarandës.
Të afërm të saj dhe kalimtarë të rastit janë përpjekur që ta ndihmojnë duke i dhënë ndihmën e parë turistes Tereza Zakarelo. Aty ka ndërhyrë edhe vetë Gurma, i cili ndodhej në shëtitore së bashku me stafin e tij për inspektim.
Kryebashkiaku e asistoi turisten deri në momentin e mbërritjes së ambulancës, dhe e shoqëroi më pas deri në urgjencën e spitalit të Sarandës.
Sipas bluzave të bardha të urgjencës në Sarandë, 57-vjeçarja italiane Tereza Zakarelo mori ndihmën mjekësore për gjendje lipotimie me luhatje te tensionit, takikardi dhe çrregullime të funksionit kardiak që i kishte ardhur nga qëndrimi i gjatë në diell gjatë ditës. Ajo qëndroi në urgjencë për rreth 4 orë, dhe u largua në gjendje të normalizuar.
