Kreu i Dhomës së Avokatisë, Maks Haxhia, tha sot në një komunikim për mediat se harta e re gjyqësore është antikushtetuese. Ai theksoi se në kushtet aktuale, hapi i radhës do të jetë Gjykata Kushtetuese. “Demonstruam protestimin civil dhe demokrat pavarësisht mosdëgjimit. Pasojat janë direkte mbi ne dhe publikun. Ne dalim nga kjo sallë me një reputacion dhe të vendosur se kemi marrë qëndrim të drejtë.
Për të qenë korrekt me kuadrin ligjor dhe statutin që rregullon gjithë veprimtarinë e Dhomës, kjo mbledhje është në konform të të gjitha kërkesave dhe çdo vendim që do merret është konform ligjit. Tani hapi ynë final do të jetë Gjykata Kushtetuese. Këshilli ka ngritur një grup që do përgatisë material që do finalizohet me një kërkesë të përcaktuar konform ligjit”, tha ai.
Ndonëse hasi në kundërshtinë e fortë të avokatëve, harta e re gjyqësore është miratuar sot në mbledhjen e qeverisë. Ministri i Drejtësisë, Ulsi Manja, u shpreh se ky është një hap i rëndësishëm dhe për Reformën në Drejtësi, teksa sqaroi dhe se si do të procedohet me implementimin e hartës së re gjyqësore e cila do të bëhet me hapa.
