Berisha ka folur për dosjen e Fatos Nanos, duke theksuar se nuk e ka bërë ai dosjen dhe as nuk ka shtuar asnjë fakt në të. Ish-kryeministri Sali Berisha në emisionin “Open” në News24, iu përgjigj pyetjes nga gazetari Mentor Kikia përse nuk e futi Nanon në burg, më 2005-ën kur mori pushtetin. Ai tha se Fatos Nano kishte bërë njëherë burg. Duke qëndruar në të njëjtën linjë, shtoi më tej se qeveria e Berishës nuk ka shtuar një fakt, një provë, një dokument të vetëm, në dosjen e Fatos Nanos. Ish-kryeministri deklaroi se Nanos i njohu një meritë tjetër, që pranoi të bëjë rotacionin.
Pjesë nga diskutimet:
Kikia: Do doja të rikthehesha pak në kohë, kur ishte kryeministër Nano dhe ju ishit në opozitë. I kemi ende të freskëta akuzat për ansamblin babëzia, mamuthin e korrupsionit, ish-ministrin e Financave, dhe në 2015 kur ju erdhët në pushtet, stafi i Nanos kishte marrë vizat dhe iku i gjithi në arrati, sepse i kishte kapur një panik që këtu do të ndodhë një katrahurë me drejtësi të madhe. Por asnjë njeri nuk u vu para përgjegjësisë. Ju ishit në qeveri dhe Rama në opozitë, nuk u la akuzë pa u bërë nga opozita ndaj jush. Erdhën socialistët, askush nga ju nuk u vu para përgjegjësisë. Tani janë socialistët në pushtet dhe ju në opozitë, e njëjta histori. Tani në pankartën tuaj duket sikur mungon diçka “Rama ik se boll vodhe, se erdhi radha jonë tani”.
Berisha: Atë e shton ti.
Kikia: Unë ndjek logjikën, sepse asnjë qeveri kur ka ardhur në pushtet nuk është marrë me korrupsionin e paraardhësve, por thjesht ka vijuar të njëjtën gjë që ka gjetur të shtruar.
Berisha: A ka mundësi ta faktoj? E the për Fatos Nanon, është shumë e vërtetë. Ke shumë të drejtë, ai ka qenë një vendim politik. Pse ka qenë politik? Fatos Nano u burgos njëherë. Në mënyrë absolute, qeveria e Berishës nuk ka shtuar një fakt, një provë, një dokument të vetëm, në dosjen e Fatos Nanos. Dosjen e ka bërë Shano Korbeci me qeverinë socialiste. Shko po të duash, se ti e merr e ke aty, po gjete një të dhënë. Dosja ishte gati, nuk u bë nga ne. Por, Fatos Nanos i njoha një meritë tjetër, që pranoi të bëjë rotacionin. Më tha dikush, por nuk e lashë për atë, më tha se çfarë qëndrimi do të mbaja unë, dhe thashë që i vlerësoj atij këtë moment dhe nuk kam për t’u marrë se njëherë ishte në burg ai dhe nuk kisha të bëhesha… Absolutisht, edhe mbrapa diellit po të shkoj, Edi Rama do të mbajë llogari.
Pas kësaj deklarate, ka ardhur një kundërpërgjigje nga deputeti demokrat, Gazment Bardhi. Ai ka reaguar me anë të një statusi në Facebook, marrë shkas nga qëndrimi i Berishës se në vitin 2005 erdhi në pushtet me premtimin për të mos toleruar korrupsionin, por sipas tij, Fatos Nanon nuk e dënoi pasi ai kishte bërë një herë burg. Bardhi thotë se ëndrra e demokratëve dhe shqiptarëve për “Shqipërinë si gjithë Europa” bëhet realitet vetëm duke i dhënë fund pandëshkueshmërisë dhe korrupsionit.
Statusi
Deklarata e Sali Berishës se erdhi në pushtet në 2005 me premtimim “zero kompromis ndaj korrupsionit”, por mori vendim politik për ti ikur premtimit dhe për të amnistuar korrupsionin e qeverisë së Fatos Nanos meqënëse ai i dorëzoi pushtetin, është thelbi i sistemit të kalbur politik që ka ndërtuar trekëndshi i korrupsionit në këto 30 vite.
Deklarata e sotme shpjegon atë të para pak ditëve se në 2013 Sali Berisha e dorëzoi vetë pushtetin, duke ndjekur kështu Sali Berisha modelin e Fatos Nanos dhe Edi Rama modelin e Sali Berishës. Tani po luftojnë për “kush e ka radhën”, duke vazhduar amnistinë dhe duke marrë peng Shqipërinë.
Korrupsioni dhe amnistia ndaj tij ka marrë peng Shqipërinë në këto 30 vite. Pa ndëshkuar korrupsionin 30 vjeçar nuk ka kurrë të ardhme për Shqipërinë. Ëndrra e demokratëve dhe shqiptarëve për “Shqipërinë si gjithë Europa” bëhet realitet vetëm duke i dhënë fund pandëshkueshmërisë dhe korrupsionit. Ndryshe jemi në vendnumëro dhe ndryshojnë vetëm emrat e të korruptuarve!
