Një ditë më parë, gazetari Kastriot Myftaraj i dha fund jetës duke u hedhur nga kati i katërt i banesës ku banonte, në lagjen “Ali Demi” në Tiranë. Në momentin që kreu aktin e rëndë, në banesën e tij ka qenë edhe e ëma, 90-vjeç. Burime jo zyrtare thanë se Myftaraj ishte diagnostikuar me kancer para një jave, dhe ndodhej në gjendje të rënduar psikologjike. Për fat të keq, kjo është konfirmuar edhe nga botuesi dhe publicisti Ndriçim Kulla, i cili ka qenë ndër të fundit që ka biseduar dje me Kastriot Myftarajn, përpara se analisti të kryente vetëvrasjen.
Biseda me të ndjerin ka qenë e përqëndruar te gjendja shëndetësore, i cili kishte nisur të kurohej dhe po mendonte të vijonte trajtimin jashtë Shqipërisë. Në një intervistë ekskluzive për “Balkanweb”, Kulla thotë se Myftaraj kishte frikë të kurohej në Shqipëri, pasi mund ta vrisnin për shkak të qëndrimeve publike që ka mbajtur. Ndër të tjera ai zbulon se gazetari kishte planifikuar një udhëtim së shpejti në Zvicër. I pyetur përse Myftaraj kërkonte që të kurohej jashtë, Ndriçim Kulla tha se ai kishte një paranojë që këtu mund të vrisnin.
Ju keni qenë një prej njerëzve që bisedonit shpesh me Kastriot Myftarajn. Dje keni komunikuar?
Ai komunikonte herë pas here me mua, por shumë të afërt nuk ishim. Gjatë kësaj kohe doktor Mentor Petrela më pyeste çfarë do bënim për shkak se kishte një diagonozë për Kastriotin. Ai bënte një gjumë të pavetdijshëm në kafene. Unë mendoj se nëse ka pasur tumor, nuk do e kishte kaq agresiv. Ai mendonte si të mjekohej dhe më pyeste për këtë. I kisha dhënë disa alternativa. Doli nga spitali, dhe mendonte si të ikte jashtë. Nuk më tregonte shumë, i mbante për vete. Para dy ditësh isha në Sarandë, më mori në telefon dhe më pyeste për pulsin. I dhashë disa instruksione se çfarë bëja unë për pulsin. Më pyeti edhe dje, por më tha që kishte qenë i qetë. Nga data 10 do ikte në Zvicër. Nuk e di çfarë ka ndodhur. Nuk mund të imagjinoj asgjë. Por ai ishte i qetë.
Gjatë këtyre ditëve ka pasur njerëz që kanë dyshuar për ngjarjen. Siç kanë thënë edhe Kastriot Frashëri apo Alfred Cako, ai nuk mund të vriste veten…
Nuk mund të futem në këtë diskutim. Çdo gjë mund të ndodhë. Edhe mund të mos përjashtohet. Ai ishte i diagnostikuar me kancer, jo në mënyrë shteruese. Po ta shohësh edhe nga qëndrimet e tij, ka qenë një gazetar kontravers, shumë i kulturuar, shumë i ditur. Nuk lexonte njeri më shumë se ai në këtë vend. Herë pas here shpërthente. Unë nuk isha dakord për shumë gjëra me të. Njerëz si ai kontraversë, ia kanë thënë shoqërisë problemet hapur.
Të kthehemi edhe njëherë të biseda që keni pasur dje dy orë para se të vetëhidhej nga pallati. Çfarë bisede keni bërë? Vutë re ndonjë shenjë?
Ai konsultohej me mua. Iu thashë që kam probleme me tensionin dhe kujdesem shumë. Prandaj dhe ai më pyeste. Kastrioti ishte nipi i gruas së Arqile Botit. Doktor Boti më ka asistuar dhe më ka shpëtuar jetën. Kjo na ka lidhur me Kastriotin. Fillimisht kam hezituar të shoqërohesha me të. Ishte njeri kompleks, por shikoja gjëra që nuk i shihja te njerëzit e tjerë. Biseda dje u bë për arsye shëndetësore. Ai nuk rrinte shumë me mua, rrinte me njerëz të tjerë më shumë. Më dukej njeri shumë i fortë, luftëtar. Unë nuk e imagjoja dot që të vriste veten ai njeri. Ishte shumë hermetik në aspektin personal. Nuk mund të them se është vrarë, kjo kërkon një analizë teknike, psikologjike, sociologjike. Ai ishte në kërkim të ikjes jashtë, këtë e di mirë.
Pse donte të kurohej jashtë?
Kishte një paranojë që këtu mund të vrasin, për shkak të qëndrimeve të tij. Unë nuk dyshoj se mund ta kenë vrarë, por më çudit veprimi se ishte shumë i fortë, ishte luftëtar. Kjo më çudit.
