14-vite burg është caktuar nga Gjykata e Kurbinit për 60-vjeçaren Drane Deda, e cila goditi për vdekje me sqepar bashkëshortin e saj, Llesh Deda në nëntor të vitit 2020 në Sanxhak të Kurbinit.
Pas shqyrtimit të çështjes, ajo u shpall fajtore për veprën penale “Vrasje për shkak të marrëdhënies familjare” dhe u dënua me 21 vite burg, por përfitoi nga gjykimi i shkurtuar dhe iu ul 1/3 e dënimit. Deda do të vuajë 14 vite në një burg të sigurisë së zakonshme.
Autorja e krimit ka deklaruar më herët para oficerëve se për shumë vite kishte pasur konflikte me bashkëshortin e saj.
“Më detyroi të bëja 10 fëmijë. Më është nxirë jeta me të, edhe pse kam vijuar të qëndroj kaq gjatë. Atë ditë nuk jemi grindur fare. Ai ishte në gjumë dhe unë shkova në magazinë mora një sqepar dhe ashtu siç flinte e kam qëlluar dy-tre herë. Ku kam menduar se e kam vrarë, pasi nuk ka lëvizur fare. Më pas kam shkuar në shtëpinë e kunatës dhe i kam treguar se çfarë kishte ndodhur”, ka rrëfyer para oficrëve Drane Deda.
